ޗައިނާގައި ބޭއްވުނު ސެމިނަރގައި ބައިވެރިވުމުގެ ތެރޭގައި ވަރަށް ގިނަ މަޢުލޫމާތުތަކެއް ލިބި އައު ކަންކަން ދަސްވިކަމަށާއި އަދި ޚައިރާންކުރަނިވި ކަންކަންވެސް ފެނިގެން ދިޔަކަމުގައި ސެމިނަރގެ އެއް ބައިވެރިއެއްކަމުގައިވާ އައި.ޖީ.އެމް.އެޗުގެ ލޮލުގެ ޚާއްސަ ޑޮކްޓަރ ޑރ. ޝާމްލީ ވިދާޅުވެއްޖެއެވެ.

މިހެން އެ ބޭފުޅާ ވިދާޅުވީ، ޗައިނާ ސަރުކާރުން ދިވެހި ސިވިލް ސަރވިސްގެ 20 މުވައްޒަފަކަށް އިންތިޒާމުކޮށްދިން ޕަރފޯމަންސް މެނޭޖުމަންޓާއި ބެހޭ ސެމިނަރގެ ބައިވެރިވެ ވަޑައިގަތް އެއް ބޭފުޅެއްގެ ހައިސިއްޔަތުންނެވެ. މަސައްކަތްކުރުމުގައި އެންމެ ރަގަޅު ނަތީޖާ ނެރެވޭނެ ގޮތްތަކުގެ މައްޗަށާއި މުވައްޒަފުންނަށް މަސައްކަތްކުރުމަށް ހިތްވަރުދީ އަދި ރަގަޅަށް މަސައްކަތްނުކުރެވޭނަމަ އިސްލާހީ ފިޔަވަޅުއެޅުމުގައި ޗައިނާގައި ގެންގުޅެވޭ އުސޫލުތަކާއި ކުރާކަންކަމުގެ މައްޗަށް ތަމްރީނު ދެވުނު މި ސެމިނަރ ބޭއްވުނީ މި އޮކްޓޯބަރ މަހުގެ 16 އިން 29 އަށް ޗައިނާގެ ހައިކޫ ސިޓީގައެވެ.