މި އޮކްޓޯބަރ މަހުގެ 11 އިން 24 އަށް ޗައިނާގައި ކުރިޔަށްދެވޭ 'ސެމިނަރ އޮފް ޕަބްލިކް އެޑްމިނިސްޓްރޭޝަން ފޯރ ސިވިލް ސަރވަންޓްސް އޮފް މޯލްޑިވްސް' ގައި ބައިވެރިވާ ދިވެހި ސިވިލް ސަރވިސްގެ 20 މުވައްޒަފުން އިދާރީ ހިންގުމާގުޅޭ ގޮތުން ޗައިނާގެ ތަޖުރިބާ ހާސިލުކޮށް މިކަމުގައި ކުރިއަރާފައިވާ ޒަމާނީ ގޮތްތަކުގެ ތަމްރީނު ހޯދަމުން އެބަގެންދެއެވެ.

ޗައިނާގައި ސިވިލް ސަރވިސްގެ މުވައްޒަފުން ތަމްރީނުކޮށް ކުރިއެރުވުމަށް މަސައްކަތްކުރާ ޗައިނީސް އެކަޑަމީ އޮފް ގަވަރނަންސްގެ ފަރާތުން އިންތިޒާމުކޮށް ކުރިޔަށްގެންދާ މި ތަމްރީނުތަކުގެ މަޢުލޫމާތާއި ތަޖުރިބާ ހިއްސާކުރުމުގެ ސެޝަންތައް މިހާރުވަނީ ނިމިފައެވެ. ހުރިހާ ޚަރަދެއް ޗައިނާގެ ސަރުކާރުން ދެއްވަވައިގެން ކުރިޔަށްގެންދެވޭ މި ތަމްރީނުތަކުން ވަރަށް ފުރިހަމަ މަޢުލޫމާތުތަކެއް ލިބި މަސައްކަތުގެ ޤާބިލުކަން އިތުރުވެގެންދާ ކަމުގައި ބައިވެރިންގެ ފަރާތުން މަޢުލޫމާތު ލިބިފައިވެއެވެ.