އަލަށް އައްޔަނުކުރެވުނު 2 ޕާރމަނަންޓް ސެކްރެޓަރީ އިންގެ މަޤާމުގެ ވައުދު ގައި ސޮއިކުރުމުގެ ރަސްމިއްޔާތު އިއްޔެ ސިވިލް ސަރވިސް ކޮމިޝަނުގައި ބޭއްވުނު އެޑްވައިޒަރީ ކޮމިޓީގެ ބައްދަލުވުމުގެ ތެރޭކުރިއަށް ގެންދެވިއްޖެއެވެ.

މި ގޮތުން ވައުދުގައި ސޮއިކުރައްވަވާފައިވާ ޕާރމަނަންޓް ސެކްރެޓަރީއިންނަކީ މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އަށް އަލަށް އައްޔަނުކުރެވުނު ޑރ. އާމިނަތު ޝާފިޢާ އާއި، މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ އަށް އަލަށް އައްޔަނު ކުރެވުނު އަލްފާޞިލް މުޙައްމަދު ޝަރީފު އެވެ.

މި ދެ ޕާމަނަންޓް ސެކެރެޓަރީއިންނަށް މަރުޙަބާ ވިދާޅުވެ މަޤާމުގެ ވައުދު ހަވާލުކޮށްދެއްވެވީ ކޮމިޝަނުގެ ރައީސް ޑރ. ޢަލީ ޝަމީމެވެ. ޕާރމަނަންޓް ސެކެރެޓަރީން އަލަށް އައްޔަނުކުރުމަށް މަސައްކަތް ކުރެވެމުންދާ 9 މިނިސްޓްރީގެ ތެރެއިން އަދި މިހާތަނަށް އައްޔަނުކުރެވިފައިވަނީ މި 2 މިނިސްޓްރީގެ ޕާރމަނަންޓް ސެކްރެޓަރީންނެވެ. އަނެއް 7 މިނިސްޓްރީގެ ޕާރމަނަންޓް ސެކްރެޓަރީން އައްޔަނުކުރުމުގެ މަސައްކަތް ކޮމިޝަނުން ކުރިއަށް ގެންދެއެވެ.