މިނިސްޓްރީ އޮފް އިސްލާމިކް އެފެއާޒްގެ ސްޓަރަކްޗަރ ބަދަލުކުރުމާ ބެހޭގޮތުންނާއި، އަތޮޅުތެރޭގެ ރަށްރަށުގެ މިސްކިތްތަކުގައި ބަދަލު އިމާމުން ހަމަޖައްސަވާއިރު ލޯފަން އިމާމުމްނަށް އިސްކަންދީގެން ވަޒީފާ ހަމަޖެއްސުމާ ބެހޭގޮތުން މަޢުލޫމާތް ހިއްސާކުރުމުގެ ގޮތުން މިނިސްޓަރ އޮފް އިސްލާމިކް އެފެއާޒް ޑރ. އަޙްމަދު ޒާހިރު އާއިއެކު އެމިނިސްޓްރީ ގައި ސިވިލް ސަރވިސް ކޮމިޝަނުގެ ފަރާތުން މަޝްވަރާ ބައްދަލުވުމެއް މިއަދު ބާއްވަވައިފިއެވެ.
ކޮމިޝަނުގެ ރައީސް ޑރ. އަލީ ޝަމީމާއި ކޮމިޝަނުގެ ނައިބު ރައީސް އަލްފާޟިލް ޝަހީދު މުޙައްމަދު އާއި މެންބަރު އަލްއުސްތާޛް ޒަކަރިއްޔާ ހުސޭނާއި، ކޮމިޝަނުގެ މެންބަރު ފާތްމަތު އާމިރާ އިސްކޮށް ބައިވެރިވެވަޑައިގަތް މި ބައްދަލުކުރެއްވުމުގައި އިސްލާމިކް މިނިސްޓްރީއިން ބޭނުންވާކަންކަމުގައި ކޮމިޝަނުގެ ފަރާތުން ފުރިހަމަ އެއްބާރުލުން އެމިނިސްޓްރީއަށް ލިބިވަޑައިގަންނަވާނެކަމުގެ ޔަގީންކަން ކޮމިޝަނުގެ ރައީސް މިނިސްޓަރަށްއެރުވިއެވެ.