ފަސް ދުވަހުގެ ރަސްމީ ޒިޔާރަތެއް ރާއްޖެއަށް ކުރައްވަމުންގެންދަވާ ބަންގްލަދޭޝް ޕަބްލިކް ސަރވިސް ކޮމިޝަނުގެ 2 މެންބަރުންނާއި 3 މުވައްޒަފުންގެ ވަފުދު، މިއަދު މިނިސްޓަރ އޮފް އެންވަޔަރަންމަންޓް ޑރ. ޙުސައިން ރަޝީދު ޙަސަން އާ ބައްދަލުކުރައްވާފިއެވެ. މި ޒިޔާރަތުގައި މިނިސްޓްރީ އޮފް އެންވަޔަރަންމަންޓްގެ ފަރާތުން މި ބޭފުޅުންނަށް މަރުޙަބާ ދެންނެވީ ޕަރމަނަންޓް ސެކްރެޓަރީ އަޖުވަދު މުސްޠަފާއެވެ.  މި ބައްދަލުވުމުގައި މިނިސްޓްރީ އިން ކުރިއަށް ގެންދާ މަސައްކަތްތަކާގުޅޭ ގޮތުންނާއި އަދި ދިވެހިރާއްޖެ ފަދަ ކުދި ޖަޒީރާ ރަށްތަކެއްވާ ޤައުމަކަށް ކުރިމަތިވެފައިވާ ތިމާވެށީގެ ގޮންޖެހުންތަކާ އަދި ބަޖެޓްގެ ދަތިތަކާ ގުޅިގެން ތިމާވެށްޓާ ގުޅޭ ޕްރޮޖެކްޓްތައް ހިންގުމުގައި ދިމާވާ ގޮންޖެހުންތަކާ ބެހޭގޮތުން މަޝްވަރާކުރެވުނެވެ.
މިއަދުގެ މި ބައްދަލުވުމުގައި މިނިސްޓަރ ގެ އިތުރުން މިނިސްޓްރީގެ އިސް ފަންތީގެ ބޭފުޅުންވަނީ ބައިވެރިވެވަޑައިގެންފައެވެ. މި ޒިޔާރަތުގައި މިނިސްޓްރީގެ މަސައްކަތް ހިނގަމުންދާ ގޮތާއި ގުޅޭ މަޢުލޫމާތާއި ސިވިލް ސަރވިސް މުވައްޒަފުންގެ ކަންކަން ބަލަހައްޓާގޮތުގެ މަޢުލޫމާތު ޙިއްސާކުރެވުނެވެ.