ކޮވިޑް 19 ގެ ވަބާއިން މީހުން ސަލާމަތްކުރުމަށް އެންމެ މުހިންމު އަދި ބުރަ މަސައްކަތް ކުރައްވަމުން އަދި ސިއްހީ އެހެން ހުރިހާ ފަރުވާތައް ވެސް ރަނގަޅަށް ލިބިދެމުންގެންދާ ރާއްޖޭގެ އެންމެ ބޮޑު ހޮސްޕިޓަލް ކަމުގައިވާ އައި ޖީ އެމް އެޗް ސްޓާފުން ކުރައްވަމުން ގެންދަވާ މިންނެތް ޚިދުމަތުގެ އަގުވަޒަންކުރުމުގެ ގޮތުން އަދި ވަރުބަލިކަމެއްނެތި މަސައްކަތް ކުރެއްވުމަށް ހިތްވަރުދިނުމުގެ ގޮތުން މިއަދު ހެނދުނު ސިވިލް ސަރވިސް ކޮމިޝަނުގެ ފަރާތުން ކަށިކެޔޮ ކޭކް ގެ 2 ކޭކް އައިޖީއެމްއެޗަށް ހަދިޔާކޮށްފިއެވެ. މި ހަދިޔާ ބަލައިގަނެ އަދި ކޭކް ފަޅުއްވާދެއްވެވީ އެ ހޮސްޕިޓަލްގެ ޗީފް އެގްޒެކެޓިވް އޮފިސަރ އިބްރާހިމް ސަލީމެވެ.
މި ކަމަކީ 11 އެޕްރީލު 2020 ގައި ކޮމިޝަނުގެ ރައީސް ޑރ. އަލީ ޝަމީމް އައި ޖީ އެމް އެޗަށް ވަޑައިގެން އެތަނުގެ ކަންކަން ބައްލަވާލެއްވުމުގެ ގޮތުންނާއި ސްޓާފުން ކުރައްވަމުން ގެންދަވާ ތައުރީފު ހައްޤު މަސައްކަތްތަކަށް ޝުކުރުއަދާ ކުރެއްވުމުގެ ގޮތުން ސީ.އީ.އޯ އިބްރާހިމް ސަލީމާއި އެކު ބޭއްވުނު ބައްދަލުވުމެއްގައި ވާހަކަދެކެވި ހަމަޖެހިގެންދިޔަކަމެކެވެ. އިއްޔެ ބޭއްވުނު ބައްދަލުވުމުގައި އިއްތިފާގުން މިނިސްޓަރ އޮފް ހެލްތު އަބްދުﷲ އަމީން އާއި ރައީސުލްޖުމްހުރިއްޔާ އޮފީހުގެ މިނިސްޓަރ ޢަލީ ޝިޔާމް އާއިވެސް ކޮމިޝަނުގެ ރައީސަށް ބައްދަލުވުމުގެ ފުރުސަތު ލިބިވަޑައިގަތެވެ. މި ބައްދަލުވުމުގައި ކޮވިޑް 19 ގެ ރޯގާ އާއި ގުޅިގެން ސިވިލް ސަރވަންޓުން ކުރައްވަމުން ގެންދަވާ މަސައްކަތްތަކާއި އެފަރާތްތަކުގެ މަސައްކަތު ހާލަތު އޮތްގޮތާ ގުޅޭގޮތުން މަޝްވަރާކުރެވުނެވެ. އަދި ސަރުކާރާއި ހެލްތު މިނިސްޓްރީއަށް ކުރައްވަމުން ގެންދަވާ މަސައްކަތްތަކަށް ތަޢުރީފު ކުރައްވަވައި ހެޔޮ ނަސީބާއި ކާމިޔާބަށް އެދިވަޑައިގަތެވެ.