ސިވިލް ސަރވިސް ކޮމިޝަނުން ލޯކަލް ގަވަރމަންޓް އޮތޯރިޓީ އާއި ބައްދަލުކޮށް މަޝްވަރާކުރައްވައިފިއެވެ. މިއަދު މެންދުރު ސިވިލް ސަރވިސް ކޮމިޝަނުގައި ބޭއްވުނު މި ބައްދަލުވުމުގައި މިނިސްޓަރ އޮފް ހޯމް އެފެއާޒް އޮނަރަބަލް އިމްރާން އަބްދުﷲ އަދި އެލް.ޖީ.އޭގެ ސީ.އީ.އޯ އަފްޝަން ލަތީފް ވަނީ ބައިވެރިވެވަޑައިގެންފައެވެ.
މިއަދުގެ ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނު ކަންތައްތަކަކީ ސިވިލް ސަރވިސްގެ މުވައްޒަފުން ކައުންސިލްގެ އިދާރާގެ ވަޒީފާތަކަށް އައްޔަނު ކުރުމާއި ގުޅޭގޮތުންނާއި އަދި ކައުންސިލްތަކުގެ އިދާރާގައި ހައިބްރިޑް ނިޒާމު ތަންފީޛުކުރުމަށް ބޭނުންވާ ތަމްރީނުތައް ދިނުމާއި ގުޅޭގޮތުންވެސް ވަނީ މަޝްވަރާ ކުރެވިފައެވެ. އަދި މިއަދުގެ ބައްދަލުވުމުގައި ކައުންސިލްތަކުގެ އިދާރީ އޮނިގަނޑުތައް މުރާޖައާކުރުމާއި ސެކްރެޓަރީ ޖެނެރަލްގެ މަޤާމަށް މުވައްޒަފުން ހަމަޖެއްސުމާއި ގުޅޭ ޕްރެޒެންޓޭޝަނެއް ކޮމިޝަނުން ވަނީ ހިއްސާކުރައްވާފައެވެ.
ކޮމިޝަނުގެ މެންބަރުން އަތޮޅު އަދި ސިޓީ ކައުންސިލްތައް ހިންގުމުގައި ސީ.އެސް.ސީ އާއި އެލް.ޖީ.އޭ އަދި ސެކެޓްރީ ޖެނެރަލުން ގުޅިގެން މަސައްކަތްކުރުމުގައި ކޮމިޝަނުގެ ފަރާތުން 100 އިންސައްތަ އެއްބާރުލުން ލިބޭނެކަމުގެ ޔަގީންކަން މިނިސްޓަރަށާއި އަދި އެލްޖީއޭގެ ސީއީއޯ އަށް އެރުވިއެވެ.