ޗައިނާގެ ސަރުކާރުން ހުރިހާ ހަރަދެއް ދެއްވަވައިގެން ކުރިއަށް ގެންދާ "ސެމިނަރ އޮފް ޕަބްލިކް މެނޭޖްމަންޓް ފޯރ ސިވިލް ސަރވަންޓްސް އޮފް މޯލްޑިވްސް" ސެމިނަރގައި ބައިވެރިވާ ފޭސް 2 ގެ ބައިވެރިން މިހާރު ޗައިނާގައި ތަޖްރިބާ ހާސިލުކުރަމުން އެބަގެންދެއެވެ. 30 ސިވިލް ސަރވަންޓުންނާއެކު މި އޯގަސްޓު މަހުގެ 6 ން 26 އަށް ޗައިނާގެ ނަންޗެންގް ސިޓީ ގައި ކުރިއަށްގެންދާ މި ސެމިނަރގައި މިއަދު އޮތީ އޯޕަނިންގ ސެރަމަނީ އެވެ. މި ބައިވެރިންނަށް ތަމްރީނާއި މަޢުލޫމާތު ދެވޭ ދާއިރާތަކުގެ ތެރޭގައި، ޗައިނާގެ ސިވިލް ސަރވިސް ހިނގާގޮތާއި ޗައިނާގައި އިޤްތިޞާދީ ކަންކަން ހިނގާގޮތައި ޚާރިޖީ ގުޅުންތައް ކުރިޔަށްގެންދެވޭގޮތުގެ މައުލޫމާތު ހިމެނެއެވެ. މީގެ އިތުރުން ޗައިނާގެ ތަރައްޤީކުރިޔަށްގެންދެވޭ ގޮތާއި އިޤްޠިސާދީ ބޮޑެތި މަޝްރޫއުތަކުގެ މައުލޫމާތާއި ތަޖްރިބާ ހިއްސާކުރުން ވެސް މި ޕްރޮގްރާމުގައި ހިމެނެއެވެ.
ޗައިނާގައި ތަމްރީނު ފުރިހަމަކުރަމުންދާ ދިވެހި ސިވިލް ސަރވިސްގެ ވަފުދަށް ޗައިނާގެ ޘަޤާފަތާއި އުމްރާނީ ކުރިއެރުންތައް ބަލާލާ ތަޖްރިބާކޮށްލުމުގެ ފުރުޞަތާއި އަދި ޗައިނާގެ މަޝްހޫރު ބައެއް ތަންތަނާއި އިޖްތިމާއީ ޚިދުމަތްތައް ދޭ ތަންތަނަށް ޒިޔާރަތްކުރުމުގެ ފުރުޞަތު ޖިއަންޒީ ކޮލެޖް އޮފް ފޮރިން ސްޓަޑީސްގެ ފަރާތުން ވަނީ ފަހިކޮށްދީފައެވެ. މި ތަމްރީނަކީ މި އެކަޑަމީގެ ފަރާތުން މުވައްޒަފުން ތަމްރީނުކުރުމަށް މިއަހަރު ބާއްވާ 2 ވަނަ ޕްރޮގްރާމެވެ. އެހެންކަމުން މި އަހަރު 60 ސިވިލް ސަރވަންޓުންނަށް މި ފުރުސަތު ވަނީ ލިބިގެންގޮސްފައެވެ.