އާސްތާނާ ސިވިލް ސަރވިސް ހަބް ޖަމްއިއްޔާގައި ސިވިލް ސަރވިސް ކޮމިޝަން މެންބަރެއްގެގޮތުން ބައިވެރިވުމަށާއި އަދި މި ޖަމްއިއްޔާގެ އަހަރީ ކޮންފަރެންސްގައި ބައިވެރިވެވަޑައިގަތުމަށް މިހާރު ކަޒަކިސްތާން ގެ ވެރިރަށް ނޫރު ސުލްތާން އަށް ޒިޔާރަތްކުރައްވަމުން ގެންދަވާ ކޮމިޝަނުގެ ރައީސް ޑރ. އަލީ ޝަމީމް މިއަދު ޕަބްލިކް އެޑްމިނިސްޓްރޭޝަން ރިފޯމް ނުވަތަ އިސްލާޙުކުރުމާބެހޭ ވާރކްޝޮޕެއްގައި ބައިވެރިވެވަޑައިގެންފިއެވެ. މިއީ އާސްތާނާ ސިވިލް ސަރވިސް ހަބް ޖަމްއިއްޔާގެ ފަރާތުން ކަޒްކިސްތާނުގެ "ނަޒަރު ބަޔޭވް ޔުނިވަރސިޓީ" ގައި ބޭއްވި އެއްދުވަހުގެ ވާރކްޝޮޕެކެވެ.

މި ވާރކްޝޮޕްގައި މަޢުލޫމާތުދެއްވެވީ ފުލޮރިޑާ އެޓްލާންޓިކް ޔުނިވަރސިޓީގެ ޕްރޮފެސަރެއް ކަމުގައިވާ އަދި އިންޓަރނޭޝަނަލް ޖާރނަލް އޮފް ޕަބްލިކް އެޑްމިނިސްޓްރޭޝަން ގެ އޮޑިޓަރ އިން ޗީފް ޕްރޮފެސަރ އަލީ ފަރަޒްމާންޑް އެވެ. މި ވާރކްޝޮޕްގައި އެމެރިކާ އާއި އެހެނިހެން ތަރައްޤީވެފައިވާ ގައުމުތަކުން ސަރުކާރުގެ ޚިދްމަތް ދިނުމުގައި އުފައްދާފައިވާ ސިވިލް ސަރވިސް ނުވަތަ ޕަބްލިކް އެޑްމިނިސްޓްރޭޝަން އިސްލާހުކޮށް ކުރިއަރުވާފައިވާ ގޮތުގެ މަޢުލޫމާތު ހިއްސާ ކުރެއްވެވިއެވެ.