މިހާރު ސްރީލަންކާ އަށް ކުރައްވަމުންގެންދަވާ ދަތުރުފުޅުގައި ސިވިލް ސަރވިސް ކޮމިޝަނުގެ ރައީސް ޑރ. އަލީ ޝަމީމް ލަންކާގައި ހުންނަ ދިވެހިރާއްޖޭގެ އެމްބަސީއަށް މިއަދު ޒިޔާރަތްކުރައްވަވައި އެތާނގައި މަސައްކަތްކުރާ ދިވެހި ސިވިލް ސަރވަންޓުންނާއި ބައްދަލުކުރައްވަވައިފިއެވެ. މި ބައްދަލުކުރެއްވުމުގައި އެފަރާތްތަކުގެ ޚިޔާލު ހޯއްދަވައި މަސައްކަތުގެ ކަންހުރި ނެތުގޮތުގެ މައުލޫމާތު ސާފު ކުރެއްވެވިއެވެ. އަދި ސިވިލް ސަރވަންޓުންގެ ކުރިއެރުމަށް ކޮމިޝަނުން ކުރަމުންދާ މަސައްކަތްތަކުގެ މަޢުލޫމާތު އެފަރާތްތަކާއި ކޮމިޝަނުގެ ރައީސް ހިއްސާކުރައްވަވައި އަދި އެފަރާތްތަކުގެ ހުނަރާއި ޤާބިލުކަން އިތުރުކުރުމަށް އަބަދުވެސް މަސައްކަތްކުރެއްވުމަށް އެދިވަޑައިގެންނެވިއެވެ. މީގެ އިތުރުން ޚިދުމަތްދިނުމުގައި ސިވިލް ސަރވިސް ކޮމިޝަނުން ކަނޑައަޅާފައިވާ މިންގަނޑުތަކަށް އަހުލުވެރި އެ ފެންވަރުތަކުގައި ޚިދުމަތްދިނުމަށް ސަމާލުވެވަޑައިގަތުމަށް އިލްތިމާސް ކުރެއްވެވިއެވެ.
ދިވެހި އެމްބަސީގައި ސިޔާސީވެރިންނާއި ސިވިލް ސަރވިސްގެ މުވައްޒަފުން ގުޅިގެން ވަރަށް ރަނގަޅަށް މަސައްކަތް ކުރެވެމުންދާކަން މުވައްޒަފުންގެ ވާހަކަތަކުން އޮޅުންފިލުމުން މިކަމަށް ކޮމިޝަނުގެ ރައީސް މަރުޙާބާ ވިދާޅުވެ، ނަމޫނާ އެމްބަސީއެއްގެ ގޮތުގައި ދެކެވަޑައިގަންނަވާކަން ފާހަގަކުރެއްވެވިއެވެ. އެމްބަސީގައި މަސައްކަތްކުރައްވަވާ މުވައްޒަފުންގެ މެދުގައި ދުޅަހެޔޮ ޓީމްވާރކް އެއް އޮންނަކަމާއި މަދު މުވައްޒަފުންކޮޅެއް ރަނގަޅު ގިނަ ޚިދުމަތްތަކެއް ދެއްވުމުގައި އަވަދިނެތި ބުރަކޮށް މަސައްކަތް ކުރައްވަވާކަންވެސް ކޮމިޝަނުގެ ރައީސް ފާހަގަކުރެއްވެވިއެވެ. އަދި މިއަހަރަކީ ދިވެހި ސިވިލް ސަރވަންޓުންނަށް މުސްތަޤްބަލު އަލި އަހަރެއްކަމުގައި ދެކެވަޑައިގަންނަވާ ކަމަށާއި، ދިވެހި ސިވިލް ސަރވިސް ހިންގުމުގައި ހެޔޮ އިސްލާހުތަކެއްގެނެވޭނެ އަހަރަކަށްވެގެންދާނެ ކަމުގައިވެސް ކޮމިޝަނުގެ ރައީސް ފާހަގަކުރެއްވެވިއެވެ. އަދި ދިވެހި ސަފީރު އުމުރު އަބްދުއްރައްޒާޤް އާއި އިސްވެރިން ސިވިލް ސަރވަންޓުންނަށް ވަރަށް ހެޔޮކޮށް ހިއްތަވައި ކަންފަހިކޮށްދެއްވަވާތީ ރައީސް ޝުކުރު އަދާކުރެއްވެވިއެވެ.